جس نبض
عاملين إيه يا كويرز في الحر ده؟ يومكم سعيد، ونتمنى تكونوا بخير، بتشربوا ميّة أكتر في موجة الحر اللي جاية، وبتهتموا بنفسكم أكتر وبحبايبكم، بتروحوا، بتزقططوا، وتتنططوا هنا وهناك وف كل حتة..
قلنا وقالوا
حكمت محكمة الاستئناف على 26 شخص بأقصى عقوبة في القانون، حكمًا نهائيًا تراواحت الأحكام بين ثلاث وخمس سنين حبس ومثلهم مراقبة، في مساحات نشعر بالأسف تجاه ما حدث وسنحاول في الفترة القادمة التركيز أكثر على التوعية بالأمان الفردي والجماعي واللي ممكن نشاركه في التحقيقات وازاي ما نسببش لنفسنا الإدانة.
تقدروا تكتبوا لهم جوابات هنحاول نوصلها لهم، عبر نموذج التواصل في موقع كوين بوت للأبد
تعرضت صفحة مساحات على فيسبوك لحملة كراهية شعواء، وحفاظًا على من يعلقون أو يتواجدون على صفحتنا هناك قررنا إخفاء الصفحة إلى حين، والاعتماد على المساحات الآمنة المغلقة، من أجل النشر فيها واستمرار رسالتنا. كما نحاول التعاون مع شركاء مختلفين لتوحيد جهودنا في مواجهة العنف الرقمي الذي يتعرض له الكويرز في مصر والسودان ومنطقتنا ككل.
لازلنا ننشر على تيك توك وانستاجرام فتابعونا هناك
مساحات على إنستجرام - مساحات على تيك توك
أنشأنا في وقت سابق وقبل أسابيع موقع كوين بوت للأبد، وهو أول موقع يحمل فخرنا وقهرنا معًا في قارب صغنون هتلاقوه مستنيكم في الموقع، وفي قايمة أغاني تقدروا تسمعوها، اختارها ناس كوير زيكم وتقدروا تبعتولنا رسايلكم هناك، كمان ممكن من خلال الموقع تشتركوا في نشرة مساحات أو تسيبولنا رسايل، تجارب وقصص مختلفة حابين نشاركها عالموقع، فيلاااا خدو لفة فيه، وابعتوا أغانيكم الكوير واسمعوا الأغاني اللي شاركها معانا ناس تانيين.
مهرب
صدرت حديثًا عن دار المحروسة ، رواية “شيء إلهي” للكاتب محمد عبد النبي، وهي رواية تتحدث عن شيء غريب وغير مألوف يحدث، رجل يحمل في بطنه ويلد فتتبدل حياته تمامًا.. عجبتنا الفكرة ولكن كانت لنا ملاحظات على السرد وكأن الرواية مكتوبة على عجالة.
صدر هذا الشهر فيلم هارت ستوبر، بعد ثلاث مواسم من المسلسل الشهير بحيث يكون مسك الختام لتلك التجربة اللي دوبت قلوبنا، عيطنا فيها وضحكنا وعشنا مراهقتنا من تاني بشكل رومانسي وكيوت وكتكوت، حسينا باللي افتقدناه، واللي لسا بنفتقده بمحاولات الحب والإنكار، خطوة لورا وخطوة لقدام وعشنا مشاعر مراهقة كويرية متأخرة الله لا يحرم حد منها، فمتنسوش تشوفوه، وفي مساحات بنفكركم إن نتفلكس مقاطعة، ففكروا في مشاهدة الفيلم بطرق مختلفة.
فيلم الأوديسا نزل في السينمات، هناك دعوات لمقاطعته لأنه اتصور في مناطق محتلة بالصحراء المغربية، شفناه قبل ما نعرف المعلومة دي، والفيلم أسطورة أوديسية سينمائية، رغم إن سينمات مصر اللي كانت من أوائل سينمات العالم، على قدها دلوقتي.
ياريتني كنت عرفت
- إن واتساب بقى فيه يوزر نيم (اسم المستخدم) دلوقتي، فبدل ما تشاركوا رقمكم مع الناس ويسجلوه، مهاب حلو من أكتوبر أو عبعزيز بوتوم الهرم أو فلان اللي قال إنه فيرس، ابعتوا بدل الرقم اليوزر نيم وممكن مش كل اللي معاهم اليوزر نيم يقدروا يتواصلوا معاكم حتى، كمان ممكن تعملوا رقم للتحقق لازم الشخص يدخّله لا مؤاخذة علشان يعرف يبعتلكم رسالة جديدة.
- إن في لقاحات مختلفة بتتاخد للوقاية من بعض الأمراض الجنسية، أيوة وتقدروا تاخدوا اللقاحات الخمسة اللي اتكلمنا عنهم في بوست الشهر ده (اضغطوا هنا وشوفوه)، روحوا أقرب مركز للمصل واللقاح وخدوهم، شجعوا بعض وخدوهم بقلب جامد. اللقاحات دي مهمة حتى لو مش بنعمل سجس، لأن الفيروسات بتاعتها مش بس بتنتقل بالسجس!
ملحوظة تتوفر هذه اللقاحات مجانًا للمتعايشين والمتعايشات في الحميّات..
اديني حنان يا سكّر
طيب يا ترى هو اللي خايف ممكن يحب؟
باختصار اللي خايف يقدر يحب، ويمكن الحب يكون هو اللي بيطمنا أصلًا في ظروفنا لما الخوف يبقى بيئة، بنتنفس فيها خوف، قاعدين بنبص حوالينا بنحاول قدر الإمكان نعيش تحت الأرض وتحت كل أرض علشان نقدر نعيش.
لازم يكون عندنا مساحات صغيرة (بس بلاش والنبي المساحات دي تبقى جروبات واتساب وتيليجرام علشان لو حد سقط في يد الأمن بيلموا كل الشلة) فنعمل مساحتنا، نحب لأن الحب مقاومة، ونفرق بين الخوف اللي حوالينا، في القانون والمجتمع والبيت، والخوف اللي ساكن جوانا، بيخلينا نشك في إمكانية الحب في البلد دي وفي إننا نستاهل نتحب أو نحب أصلًا ولا لا..
طريق الحب بيشّوك وصدق اللي قال:
مشيت على الأشواك وجيت لأحبابك
لا عرفوا إيه ودّاك ولا عرفوا إيه جابك
رميت نفسك في حضن سقاك الحضن حزن
حتى في أحضان الحبايب شوك يا قلبي
ويبقى سؤال العم نجم، حد ضامن يمشي آمن أو مآمن يمشي فين؟
دعوة ولامؤاخذة مفتوحة
ابعتو رسالة لشخص مش موجود، يمكن يشوفها في النشرة، المساحة دي هتكون ليكم..
تقدروا تبعتوا من خلال النموذج الموجود في موقع كوين بوت للأبد، أو بإرسال رسايل لينا هنا على سبستاك أو في حساباتنا التانية على باقي المنصات..
وهننشر رسايلكم في الحتة دي في النشرات الجاية
نشوفكم على خير في النشرة الجاية
كونوا آمنين
ودمتم سالمين
فريق مساحات
روابطنا: موقع كوين بوت للأبد - مساحات على إنستجرام - مساحات على تيك توك مساحات على فيسبوك
